http://forum.te3p.com/uploaded4/107168_11206279497.gif

احبابى واخوانى واخواتى الاعزاء اعزكم واحبكم الله

اليوم كده جه على خاطرى موضوع كنت عايز اكتب فيه وهو موضوع السرحان والسهو فى الصلاه

وكيفيه التخلص منه ..ولكن فجأه ما قدرت اكمله لان كان ذهنى شارد ومرهق شويه وهو موضوع طويل

لذا استبدلته بالموضوع ده لانى فى الحقيقه كنت مجهزه من كام يوم وفضلت اعرضه عليكم ..

وهو فى الحقيقه كنت قرأته من زمان وحبيت ان انقله لكم و تعم الفايده علينا جميعا وبسم الله نبتدى.

" إِنَّا كُلَّ شَيْءٍ خَلَقْنَاهُ بِقَدَرٍ (49)" القمر

الحواس دي ربنا خلقها بقدر.. بحدود.. ازاي يعني؟..

دلوقت انت لما بتيجي تشرب كباية مية.. قبل ماتشربها.. بص فيها.. شايف ايه؟..

صافية و زي الفل اهو

طيب لو خدنا نقطة من نفس المية دي و حطيناها تحت الميكروسكوب.. بص عليها تاني.. شايف ايه؟

يا خبر .. آلاف و مئات الإلوف من الجراثيم والبكتريات والـعصيات ،

انت لو مسكت كل كباية مية قبل ماتشربها و فحصتها تحت الميكروسكوب..

مش هاتشرب مية في حياتك خالص..

تستنتج ايه من ده؟..

ان قدرة الإبصار محدودة..

انت تقدر تشوف الأشياء على بعد 100 متر أو 200 متر على الأكتر.. و بعد كده ماتقدرش تشوف حاجة..


و دكتور العيون لما بتروحله بيقيس حدود القدرة دي.. بيحط لك اللوحة بينك و بينها حوالي 5 متر او اكتر فتشوف الفتحات اللي في الدوائر الكبيرة..

و كل ما صغرت الدوائر بقى أصعب عليك انك تشوف الفتحات. لغاية ما ماتقدرش تميزها خالص..


اذن قدرة البصر.. ليها حدود ..

هل ده عيب؟..

هل ده نقص؟؟..

لا والله تخيل ان دي نعمة؟..


إِنَّا كُلَّ شَيْءٍ خَلَقْنَاهُ بِقَدَرٍ


نعمة لأن اللي حط الحدود دي هوالله العزيز، العليم، الخبير، البصير ، الحكيم ..

تخيل معايا كده لو زادت قوة الإبصار كده ايه اللي ممكن يحصل؟

كان حد طاق يبص في وش حد؟ ..

انت عارف.. لو جيت تبص على يعني أنعم منطقة في الجلد تحت الميكروسكوب هتشوف ايه؟..

جبااال و وديان .. منظر لا يطاق 


يعني ماكانش حد حب حد..

ولا طاق يبص في وش حد..

و لفقد من الحياة معنى الجمال.. مافيش جمال.. لأنك شايف كل حاجة على حقيقتها..


شفت ازاي ان قوة الابصار المحدودة تعتبر نعمة من نعم الله عز وجل .


تعرف ان الهوا مليان صور؟..

شايفها؟.. مش مصدقني؟..

امال الصورة اللي بيلقطها التلفزيون دي بتيجي منين؟..

مش كانت موجات في الهوا؟..

تخيل انك تقدر تشوف الصور دي.. كان ايه اللي يحصل؟..

الهوا مليان بالأصوات؟.. بتقدر تسمعها؟..

اذاعات العالم كله عبارة عن موجات في الهوا..

الراديو بيلقطها. و اذنك اللي ربنا خلقهالك ماتقدرش..

تخيل لو كان السمع غير محدود و كنت تقدر تسمع الموجات دي في الهوا.. كان يحصل ايه؟..

كنا نتجنن..اكيد حاتتجنن

تخيل انك سامع اذاعات العالم كلها في نفس الوقت..

نعمة من الله سبحانه و تعالى..


نعمة ان الحواس محدودة..

تخيل لو حاسة السمع بس مالهاش حدود..

تخيل انت قاعد في بيتك و سامع صوت خناقة في الصين..

و صوت كل موتور عربية في أمريكا..

و صوت شلالات نياجرا في كندا و و و ..

تخيل انك سامع كل الأصوات اللي على الكرة الأرضية من شمالها لجنوبها لشرقها لغربها في نفس الوقت؟..

كانت الحياة تبقى مستحيلة..

http://forum.te3p.com/uploaded4/107168_01206903447.jpg

إِنَّا كُلَّ شَيْءٍ خَلَقْنَاهُ بِقَدَرٍ .

ربنا سبحانه و تعالى خلق الموجات الصوتية بتضعف و تتلاشى بعد مسافة معينة..

زي لما ترمي طوبة في المية في بحيرة مثلا أو في النيل.. بيحصل ايه؟..

بتلاقي موجات صغيرة في صورة دواير.. بتطلع و تكبر لغاية ماتختفي و مركزها مطرح ما الطوبة نزلت..

موجات الصوت ربنا خلقها كده .. تكبر و تتلاشى.. الكلام ده على الأرض..

و سبحان الله.. ربنا برضه خلى نفس الموجة تحافظ على قوتها ولا تتلاشى في الفضاء برة كوكب الأرض..


بدليل انهم بعتوا مركبة فضائية لكوكب المشترى بسرعة 40000 كم في الساعة مشيت 6 سنين لغاية ماوصلت للمشترى.. و أرسلت صور لكوكب الأرض من هناك..

و تخيل ان الموجات المحملة عليها الصور دي فضلت ثابته و سعتها لم تقل لغاية ماوصلت للأرض..

تخيل لو ان الموجات الصوتية على الأرض فضلت محافظة على سعتها و قوتها.. كان يحصل ايه؟..


http://forum.te3p.com/uploaded4/107168_01206903447.jpg

إِنَّا كُلَّ شَيْءٍ خَلَقْنَاهُ بِقَدَرٍ

وكذلك الســمع والبصـر والشـم ، فالشـم محـدود أيضـاً فـلو أن الإنسـان يشـم الروائـح الكريـهة لمســـافـات بعيـدة كرائحـة دابـة ميتة فـي بلد آخر فتصبح الحياة في بلدك مستحيلة ..

ولكن حكمة رب العالمين إذا كانت رائحة كريهة على بعد 200 م فإنها تنتهي وتتلاشى ،

فـراكب السـيارة قد يشم رائحة كريهة في طريقه ، وبعد لحظات يبتعد عنها وتنتهي الرائحة ،


اذا يبقى احنا اتفقنا ان ربنا كرم الإنسان بالقوة الإدراكية..

و اعطى القوة الإدراكية دي الأبواب اللي محتاجاها عشان تشتغل.. اللي هي الحواس..

و من نعم ربنا انه خلى الحواس دي محدودة ..

طيب مادامت الحواس دي محدودة..

هل ننكر الأشياء الغير محسوسة؟.. اللي حواسنا ماتقدرش تدركها؟..

ازاي؟..
خليك معايا

مثلا.. فيه أجهزة دلوقت لطرد الحشرات زي الناموس.. و القوارض و الفئران.. الأجهزة دي بتشتغل بانها بتصدر أصوات تزعج الحشرات و الفئران ..

لكن مايسمعهاش الإنسان.. فلما تسمعها الحشرات أو الفئران.. تهرب..

هل أقدر انكر ان فيه صوت لأني مش سامعه؟.. طبعا لأ..

انا مش سامعه.. لكن شايف بعيني أثره.. شايف الحشرات و الفئران بتهرب..

يبقى مش معنى اني مش حاسس بالحاجة انه مش موجودة.. أو كما يقول عـلماء التوحيد :

" عدم الوجدان لايدل على عدم الوجود " .

حد يقدر ينكر ان فيه قوة جذب بين الأرض و الشمس؟..

هل فيه حد فينا شايف حبل ممدود من الشمس للأرض و ماسكهم ببعض؟..

هل حد فينا شايف حبل متثبت في الأرض و متعلق فيه القمر مثلا .

زي البلونة كده ؟واه ياشيخ عادل

هل معنى اني مش شايفها انها مش موجودة؟.. لأ..

" فعدم الوجدان لايدل على عدم الوجود " حقيقة مسلم بها.

مثال : معلم أراد أن يـبث الإلحـاد فـي طلابه فقال : نحن لم نشاهد الخالق فإذاً هو غير موجود ،

فقام طفل وقال لهذا الاستاذ : نحن جميعاً لا نرى عقلك الذي تفكر به إذاً أنت لا عقل لك ،


قياسا على القاعدة دي.. هل احنا بنشوف العقل؟.. لأ..

لكن بنشوف آثاره.. يعني نقول الشخص ده عنده عقل والا لأمن تصرفاته...

لكن احنا مش شايفين عقله ذاته..

يعني لو واحد ماشي مثلا في الشارع عريان تماما.. ده.. عنده عقل؟؟

نقول أن لا عقل له..

طيب.. كفايه كده عليكوا عشان انتم نمتم منى

ويارب تكونوا فهمتوا حاجه ...

ناشدتك الرحمن يا قارئا ...ان تسأل الغفران لاخوكم الشيخ عادل


http://www.te3p.com/vb/uploaded2/107168_11174588405.gif