واحشنى
واحشنى صوتك الدافى
وقطر العمر والترحال
واحشنى شعرك الصافى
واحشنى والله كام موال
واحشنى أشوفك
تطمنلى روحى
وأطبطب جروحك
تطيب جروحى
واحشنى سلامك كلامك عنيك
واحشنى اهتمامك ورعشة ايديك
واحشنى يا صاحبى بكل اللى فيك
واحشنى وشوقى اليك بيناديك
واحشنى يا حاسس بفرحى وأهاتى
يا عارف وفاهم كلامى وسكاتى
واحشنى وبدونك ما تسوى حياتى
وكلمه فى سرك .. أنا روحى فيك
واحشنى يا صاحبى وأخويا العزيز
واحشنى الكلام الظريف اللذيذ
ولو كان فراقك يشل ويغيظ
بيكفينى انى .. بعيش بس ليك
واحشنى ...
محمد يوسف شاعر عامية سكندرى