الصقر عن واطي المحلات يشلع
والبوم دايم مسكنه بالخشاشي
من غرته دنياه بالغي يشرع
الجسم جسم انسان والعقل حاشي
ان شفت زوله صار يبرق ويلمع
ثوبه خفيف وحط تحته قماشي
وشهو توقع من جهول مقنع
بعد كبر راسه تكبر وطاشي
لاني بمجنون ولاني مدلع
ولا ارافق منافق ولا اطيع واشي
في عالي الرجم الطويل اتطلع
فيما خلق ربي على الأرض ناشي
ما تخفي الأيام لابد يطلع
والحي لو في داخل البحر عاشي
تراي انا قلب سبق له تلوع
ما بين كذاب وواشي وراشي
اما تعال بعــــــز ولا تقـــلع
ماني على كيف المهابيل ماشي
العلم لن صار البشر فيك تطمع
والخير من يمناك تعطيه كاشي
يلومك الحساد والا المصرع
وخيرك عليهم مثل وبل الرشاشي
ان كان قلبك يابن الاجواد ولع
هذا هو المفروض والا بلاشي
مبروك النامي