يا يمه ليه الخلق
ليه تقسَا
وانا لسه ، يادوب لسه
فى حجم النسمة مولودهْ
بتتعلم يادوب تزحف بأنفاسى
وبتْدوّر على الضحكهْ
دفا الأحضان
ما بين أهلى وبين ناسى
لقيتنى آهْ
أنا الضايع
أنا الميت
نسيت نبضى وإحساسى
ولا اللقمة بطعم اليتم ألقاها
و لا هدمة
تشيل عنى جحيم الصيف
ولا برد الشتا القاسى
كحد السيف
ولا حيطهْ عليها أسند وجع ضهرى
وأرمى حمولى عن قلبى وعن راسى
ولا أحضان تدفّينى
ولا مخلوق يعزينى ولا يواسى
لقيت فى بلادى تشريدى
وصار الجهل كَرَّاسِى
أبلّع لُقْمتى الناشفة
أغمِّسها
بملح الخوف
أنين الجوف
وموت أهلى
ودمعى ع الخدود ماسى
يا خلق الله
لو انسيتم
فى يوم ظلمى
وعهد الله أنا فاكره
ومش ناسى
شعر :أحمد السلامونى