هكذا انتهت بعض القصص لنبدأ في فتح ملف الأرامل وما يعيشانه من صراعات نفسية , فالأرملة تألمت لفقد الحبيب , وتألمت لأسئلة الصغار عن أبيهم ( بابا اتأخر ليه ... مش يمكن زعلان مني ياماما .. قولي له يرجع وانا ما عنتش هاعمل حاجه تزعله ... طب خليني اكلمه في التليفون .... بابا وحشني قوي ياماما ..... هو هاييجي في العيد ؟؟ .... عربيته راحت فين ؟؟ .... بابا نسي موبايله وساعته في الدولاب .... انتوا ليه شحتّوا هدوم بابا للناس الغلبانين ...... هو صحيح راح عند ربنا ؟؟ ..... طب انا عايز اروح له عند ربنا ...... انت ليه كدبت علينا انت ونينه وقلتوا هو مسافر ؟؟ ..... ليه اصحابي باباهم بييجي ياخدهم من الحضانة وانا ماليش بابا ييجي ياخدني زيّهم ؟؟.... فيه ولد أكبر مني بيضربني وعايز بابا ييجي يضربه ) , وتألمت لطمع الأقارب في الميراث , وتألمت لتحكمات أهل زوجها فيها , وتألمت للمحاذير التي وضعتها أسرتها حولها حتى لا يتكلم عنها الناس , وتألمت لابتعاد صديقاتها عنها وخوفهن على أزواجهن منها , وتألمت وهي تسمعهن يقلن عنها سرا "الأرملة الطروب" , وتألمت لتعرضها للمجتمع بلا غطاء من الزوج , وتألمت في إنهاء إجراءات الميراث والمعاش والوصاية , وتألمت وهي تتسلم شهادة الوفاة وقد كتب اسم زوجها لأول مرة مسبوقا بكلمة المرحوم , وتألمت وهي ترى نظرات الشفقة في أعين زملائه وزميلاته في العمل حين حضروا لعزائها , وتتألم كل يوم مع أي شئ يذكرها بزوجها , وكل شئ حولها وداخلها يذكرها به .