[ابن اليمامة]

يا نوف حدتني عليه المقادير
وبيّنت له يا نوف جل اهتامي

وأرخصت لأجل ارضاه قومٍ مناعير
بالطيب طيب وبالكرامه كِرامي

وأهديت له روحي شهاده وتقدير
وبصمت له بالعشر حبّك لزامي

وصديت عن كل الوجيه المسافير
ونذرت له بالحب برد وسلامي

فرشت له درب المحبه نواوير
وأرخيت شريانٍ لشوفته ضامي

وأسْدَلْتْ له روح النوايا المغاتير
ورفعت قدره فوق كل الأنامي

يا نوف صد وراح من دون تبرير
يا نوف ما قدّّر غلاي وهيامي

ما يدري ايامي بدونه معاسير
عيّت عيوني من فراقه تنامي

ولا يدري ان الشوق ملعون ابو صير
كافر ولا يرحم عليه الحرامي

وجدي وجود اللي حياته تعازير
باليه وقته قبل سن الفطامي

ما شاف من دنياه غير المخاسير
ولاحدٍ صفطله من خوال وعمامي

تلعبّه الدنيا وتعكس به السير
يمشي ولا يدري بعكس النظامي

يا نوف راح وعذبتني المقادير
وصارت حياتي عقب نوره ظلامي