أكيد الضمير مخنوق ( بعد التعديل )
.........
من سنين
والقلب كان ساكِن هنا
عايش حزين
صابر ويحبس دمعته
مني أنا
لأن دا حكم القدر
حاسس مقـدَّر لهفته
وقد إيه كان الحَنين
كتيرعاتبني واتـفطر
حاولت اهـدِّي كام سنه
رغم المرارة والأنين
جوانا عايشه مهيمنه
فجأه مقالش مقدمه
شفته ف يوم هد السدود
كان نفسه يهرب م القُيود
يزعق ونادي بأعلي صوت
يوصل لأعلي م الفنار
إسمعني ياكل البشر ؟
بلاش نضايق نفسنا
مهما النتيجة تكون خطر
نحكي نفضفض أو نموت
همتنا هربت مننا
طفشت وشارده هي فين؟
داخت ونايمه ع الحدود
جوَّاها بير ملهوش قرار
تاهت من الظلم الحروف
في بحر وموجه كان غدار
قال الكلام وريحته خوف
كفايه إن الصهد نار
يحرق حيتان جوه البحار
خايف ياقلبي يجيك شرار
أو تنكوي بنار الكلام
ينسجن جواك نهار
تندفن قبرك جنون
هاتبقي أنثي ومستعار
طول عمري كنت باسمعك
كتير ياقلبي واقول ظنون
اسمح لي مرة أنصحك
إحكي لي ع اللي مجننك
وانا مش هامنعك
حتي ان كدبت هاصدقك
إن شطحت بره الحدود
لو طفيت ضي الشموع
لو محيت إسم الجدود
بس تحكي من غير دموع
الموضوع!
إني شايف من الناس عجايب
رحاية دايره من غير طحين
كله في البرواز حبايب
وكل واحد له عجين
قادوس يدوس حتي البراءة
من غير دقيق
بس بحداقه
كله في الفرن عيش
يطلع بارد
يطلع ساخن
المهم الناس تعيش
تلعب بيش
تكسب شيش
الخسران دافع بقشيش
والكسبان يطلع بمفيش
واللي بيخطف
يجري ويهرب
عايش بره ولا بيجيش
وان جه يرجع
مش ممنوع
الغلبان يمسك جرنال
يقرا كلامه بالمقلوب
بين صفحاته يشوف أهوال
جناين طارحة قوالب طوب
والحقيقه تبان ف دقيقه
وكل حياتنا نتوه ف جبال
كلمة قبيحة وكدبه جريئة
ياما قرينا كتير مكتوب
يغضب ناس مالهمش ذنوب
تنسي النوم وتبات ف الديقة
في الوطنيه تشوف تدقيق
والعفوية تجيب تحقيق
عايشين حيرة وماليه قلوب
ونشوف شطارة
مالية العبارة
متفصله من غير أصول
ونعرف بطل كله شهامه
نقرا المقاله
وصف برزاله
معاه ميدالية وكون مغلوب
وصوره عريانه
من غير أدب ولا ذوق
الدنيا مليانه
و ناس دايخة في جبانه
وناس قاسية
وناس عاصية
وناس خايبه وطالعة لفوق
واللي حياته شايله كدر
غلبان وعايش قلبه انكسر
وبنفس قنعانه
وتلاقي غيره مقتدر
والبطن صعرانه
يطلع عليه القمر
يتوه جواه ويغيب
ينسي الإله ويخيب
وياريته مره يفوق
كلام قلته
ويمكن سهل نسيانه
وف قلبي شلته
وبين السطور تبيانه
المعني جوه الضمير
عايش أكيد مخنوق
أشكركم
وللجميع تحياتي