[حكمت البيداري]

محتاج الك، والله

طالت ليـالي الهجر .. وك، آه منك آه
يابو گلب من صخر .. ويلاه ما أقساه

تغيب ولا تســـئل .. باللي تلوع بيك
للروح أنت الأمل .. لوماتجيها تجيك

يانور عيني والنظر .. محتاج الك، والله ..

لحياتي، أنت الگمر .. يامنور لياليها
غيرك ياحلو السَمر .. منهو اليسليها

يا أول حِلم بالعمر .. محتاج الك، والله ..

يابهجة الأفـــراح .. يا أسعد أيامي
من شوفتك أرتاح .. تبرالي الآمي

بردان وأنتَّ الجمر .. محتاج الك، والله ..

يل همســـة شـــفافك .. اللحان تشــجيني
عطشان الك ارجوك .. من نبعك أرويني

يا أطيب من الخَمر .. محتاج الك، ولله ..

حكمت البيداري