اتربينا وشوفنا ان كل موقف بنعمله بنلاقيله مثل يعبر عنه وهو تراث الماضى
وديماً كنا بنسمع جدك كان بيقول او جدتك كانت بتقول
بس طبعا زي ما احنا عارفين ان الجيل الجديد لازم يسيب اثره على كل شيء
انا جبتلكم بعض الامثال الي كنا بنسمعها وجبت المقابل الجديد بتعها
1ـ من طلب العلا سهر الليالي
من طلب العلا يتفضل في كابينة رقم واحد
2ـ اللي بيته من أزاز ميحدفشي الناس بالطوب
اللي بيته من إزار ميغيرش هدومه في الصالون
3ـ فاقد الشيء لا يعطيه
فاقد الشيء يدور عليه
4ـ اقلب القدره على فومها تطلع البنت لأمها
اقلب القدره على فومها الفول يقع منها
5ـ تأتى الرياح بما لا تشتهي السفن
تأتى الرياح محمله بالأتربة
6ـ ياخبرالنهارده بفلوس بكره يبقى ببلاش
ياخبرالنهارده بفلوس بكره ينزل عليه اوكازيون
7ـ اللي معاه قرش محيره يجيب حمام ويطيره
الي معا قرش محيره يجيب حمام ويحمره
8ـ جت الحزينه تفرح ملقتلهاش مطرح
جت الحزينة تفرح شغلت شريط حكيم وقعدت ترقص
9ـ قال يا قاعدين يكفيكم شر الجايين
قال يامحشحشين يكفيكوا شر الكمين
10ـ الي ياكل لوحده يزور
الي ياكل لوحده يشبع
11ـ لا تبكي على اللبن المسكوب
لاتبكى على اللبن في البسكوت
12ـ اقطع عرق وسيح دمه
اقطع عرق و حته بتلو
13ـ اطبخي يا جريه كلف يا سيدي
اطبخى ياجاريه ألأنبوبه فاضيه يا سيدي
14ـ لو حبيبك عسل متلحسوش كله
لو حبيبك عسل ما تحطلوش طحينة
15ـ الي يتلسع من الشوربه ينفخ في الزبادي
الي يتلسع من الشوربة يتصل بالمطافى
16 ـ بكرة ترجع ريما لعدتها القديمه
بكره ترجع ريما من عند خلتها في مارينا
17ـ يا دخل بين البصله وقشرتها ما ينوبك الا ريحتها
ياداخل بين البصله وقشرتها حط قطرة علشان هاتدمع
18- اصوم اصوم وافطر على بصله
اصوم اصوم وافطر على المدفع
19- القرش الابيض بينفع في اليوم الاسود
القرش الأبيض بيعوم في البحر الأحمر
20- ضربو الاعور على عينه قالهم خسرانه خسرانه
ضربوا الأعور على عينه قالهم كسرتوا النضاره
21- الي ما يشفشي من الغربال يبقى اعمى
الي ميشفش من الغربال يكشف نظر
22- المال السايب يعلم السرقه
المال السايب يعلم الطلبه
23- من خرج من داره يتقل مقداره
من خرج من داره مينساش يأخد المفتاح معاه
24- الباب الي يجيلك منه الريح سده واستريح
الباب اللي يجيجلك منه الريح شيله وركب قبنورى
25- المضطر يركب الصعب
المضطر يركب التاكسى
26- رب صدفه خير من الف ميعاد
رب صدفة خير من ألف ليلة و ليلة
27- الي يخاف من العفريت يطلعله
الي يخاف من العفريت يعمل عبيط
28- الي خدتو القرعه تخدو ام الشعور
الي خدتوا القرعه تخدو ام الخلول
29- اكل العيش يحب الخفيه
أكل العيش يحب الطعميه
30- قالو للحرامي احلف قال جالك الفرج
قالوا للحرامى أحلف قالهم وحياة قلبى وأفراحوا