فايقة ... العايقة
فايقة ... العايقة
أو فايقة الندابة .. شخصية قيادية في عزبتنا ومعظم قرانا ومدننا الصغيرة .. ونادرة في المدن الكبرى .. فايقة ست مليانة طول بعرض بارتفاع .. صحتها زي الفل .. تتميز بالملاية اللف .. صاحبة فضل على البلد كلها .. والكل يحترمها ويقدرها .. لأنها عاملة الواجب مع الصغير قبل الكبير في العزبة .
عندها أخبار البلد .. اللي اتجوز واللي اتطلقت .. اللي اتحبس واللي خرج من نص المدة .. اللي اتولد واللي مات .. حتى قبل ما يموت بيكون عندها الخبر .. ويمكن تروح تستنى طلوع الروح على إيديها .. وساعات تفتي وتقول ده كان صاحب كرامات أو إن الميت ده داخل الجنة ... ودي .. وده .. وحاجات مالهاش أصل بس لها ثمن .
لسة إلى الآن ماعرفتوش مين فايقة ؟؟؟ قالوا عنها الندابة لأنها أول واحدة تندب حظها ... وأعلى صوت لما حد يموت .. وتقعد تقول : ياسبعي .. يا جملي .. والميت أصلا لاسبعها ولاجملها .. بس هي مهمتها تحرك مشاعر أهل الميت ( تسخنهم يعني ) لما الجو يهدى .
يستعملها بعض النساء في الكيد لغيرهن .. ففي العزاء تخرج إحداهن ورقة نقدية من أم خمسة أو أم عشرة جنيه وتحطها لفايقة ف إيدها وتقول لها : ماتشوفيش شر يا فايقة ... ودي شفرة معروفة عندها .. تقوم تعدد وتعلى صوتها وتولول على الميت .. وتقول دانتي كنت الحبيبة والعزيزة يا فلانة – تقصد عند الميت – وإذا دخلت واحدة للعزاء تقول لها : انت اتأخرت ليه ياأم فلان ؟؟ دا الحاج ( تقصد الميت ) زعلان منك قوي علشان اتأخرتي ... لغاية أم فلان ما تطلع المعلوم وترضي فايقة العايقة علشان تبطل تبرطم وتتطنز عليها .
فايقة صاحبة قوة سحرية .. تقدر تخللي كل النساء تبكي في وقت واحد .. وتقدر تسكتهم أيضا في وقت واحد ( مايسترو يعني ) .. مش باقول لكم إنها شخصية قيادية ..
دلوقت العزبة واقعة في أزمة بسبب إن فايقة كبرت في السن وصوتها الحياني ما بقاش يرج الدنيا زي الأول .. يعني مهاراتها تضاءلت .. بدأت البلد تحس بمشكلتين الأولى إن فايقة مالهاش خليفة في العزبة – صحيح أم حسين الندابة بتاعة الكفر اللي جنبنا موجودة بس ماتعرفش البلد والناس اللي فيها يعني ح تاخد وقت لما تتعرف على نساء البلد وتعدد لهم بأسمائهم زي فايقة وكمان ممكن ذاكرة أم حسين تكون حجمها صغير ماتتحملش بلدين .
والمشكلة التانية .. إن فايقة لو ماتت مين اللي ح تيجي تحيي ليلتها .. وهي اللي عاملة الواجب مع كل البلد ... والله دي أزمة كبيرة يا بلد ... اتصرفوا يا بلد . يا مين يجيب لنا فايقة ؟؟ حدش عنده فايقة سلف ؟؟؟
فكر وحبر / ياسر سنجر
|
النمط المتطور