قمر الليل خواطري تتونس بيه نلقى فيه اوصاف يرضاهم بالي
ياطالب عندي حبيبه ليه شبيه من مرغوبي فيه سهري يحلالي
نبات نقسّم في الليالي ننظر فيه يفرقني منه الحذّار التـــالي
خايف لا بعض السحابات تغطيه وإذا غاب ضياه يتقيثر حالـي
ياسايل عن خاطري واش مسهّيه مع الريم اللي جلى قلبي جالي
ياتهواسي خاطري واش يداويه وين الطب اللي يناسب لعلالـي
ضر معاشر كبــدتي و أنا خافيه صابر للحمى الشديدة ما ذالي
هذا المرسم كانت الخدّاعة فيه مسبوغة لنجال خلاّتو خالـــي
يا مهبلني جيت للرسم نشاكيه ما جاوبني ما اصنّت لسوالــي
مرسم ولفي كي خلى علاه نجيه نتفكر ما فات يثقب مشعالــي
واجبلي دمعي على المرسم نبكيه هشمتني الآثار كي جات قبالي
غيم المحنة ع العقل دايم كاسيه بسحابو سدّى على روس جبالي
يا مرسولي سير بجوابي وأديه يتمكن بيد الظريفة وأعنى لـي
هات أخبار الخير لي كون نبيه و المارة اللي بينا وريهّالــي
نشرتي ثوب المحبة و طويتيه واه جديد محبتك ولى بالـــي
مزقتي قلبي بشفرة هظمتيه يوم فراقك صار لي كي البوهالـي
خيالك ظاهر العين رسمتيه وين ما صديت نلقــــاه قبالـي
ودعتك مفتاح قلبي ضيعتيه سمطتي عني أيامي وأشغالـــي