يا الله يا منشي حقوق الهماليل***يا رازقٍ بالغيث شهب الروابي
يا مدبر الدنيا بيسرٍ وتسهيل***عليك تسهيل الأمور الصعابي
أنت الحكيم وتعلم العدل والميل***وأنته طبيب أحوال عبدٍ مصابي
جسمه عليل ولا عرفله تحاليل***يبحل طبيبه بين سلبي وجابي
منك الفرج يا منزل الغيث تنزيل***أنت الكريم وطالبك مايخابي
تفرج لمن لو هو على جاري النيل***ما بل كبدٍ يا بسه كاليهابي
أسهر ولا ميز نهاري من الليل***عندي طلوع الشمس مثل الغيابي
يمضي زماني بين هجس ولاويل***كن الدباء من بين الأضلاع دابي
تقل يلوج بموق عيني سماليل***تالي زماني صار فيه اقتلابي
الروس تخفضبه ويرفع به الذيل***وقامت تحكم بالأسود الكلابي
وقام الثعل يشره على صرعة الفيل***وبرق الحباري خاف منه العقابي
عانيت من صكات بقعاء غرابيل***أصبر وجاهد علتي والبلابي
للناس تفتح للسعادة مداخيل***وأنا بوجهي غلقت كل بابي
كد طوعت قبلي رجالٍ مشاكيل***يا ما أودعتهم مثل خضع الرقابي
وضربت دربٍ ما ترومه مراميل***أتلي دليله والدليله غدابي
واصبح يصيح ويزعج الويل بالويل***ما فكر إلياما بالتهالك رمابي
وشربت من بعد القراح الشهاليل***غيلٍ بصبخة واقعٍ به ذبابي
أمر وأقسى من مرار الحناضيل***يقلى على كبدي تقل سم دابي
واليا جت نجوم الليل مثل القناديل***على المغيب وكوكب النصر غابي
جتني سواهيج القلوب المغاليل***تواردني مثل سج الحرابي
هجسٍ وهاجوسٍ وتصور وتظليل***لين أضعفن الحال والراس شابي
وأصبحت عدي من أحساب المهابيل***وإلا من اللي يلعبون الكعابي
صغير سنٍ جاهلٍ مع مجاهيل***إليا قلت قولٍ مايثمن جوابي
عدي خلاوي بين كثر الأزاويل***عرفت قدر الشيب بعد الشبابي
من عقب ما ني من حساب الرجاجيل***اليوم ربعي رافضينٍ احسابي
واليا شفت حقي عندهم ناقص الكيل***أخترت عنهم صدتي واجتنابي
ما عشت بالشولة وجمع الهراميل***رزقي على رزاق عمي الدوابي
أصبر كما صبر البليهي على الشيل***جاورت مع جور الزمان وسطابي
ولوني أكل من ردي المواكيل***ألذ من منت متين العلابي
صبرت صبر أيوب عزمٍ بلا حيل***إلين الرب عادلي وعتنابي
قالوا أتسير قلت أنا مثل ماقيل***رجلي بلا حاجة تكن وتهابي
قالوا تقهوى قلت مامن فناجيل***أتلى فناجيلي وقع بالترابي
قالوا تعلى قلت وين التعاليل***راحن مع اللي برزوا بالجنابي
ربعٍ مجالسهم حديث وتماثيل***وسوالف أحدثٍ قديمة إتجابي
صعول الرجال العارفين الحلاحيل***اللي يحلون الخطأ بالصوابي
من بعدهم صرنا خيال ومخاييل***مانفك مالٍ تفترسه الذيابي
من المرقب العالي بدينا بتحويل***درنا علمنا للورى بنسحابي
واللي منازلهم بروس الأطاويل***حيلوا وحلوا بالتقى والمغابي
عقب الشرف والدين صرنا بهاليل***نسرح ونمرح ما نعرف العيابي
هرجت مجالسنا مزاهم دلاليل***بين الغلاط وسردنا بالغيابي
واشوف ناسٍ يبخسون المكاييل***من أهل الكتاب مقصرين الثيابي
عباد بالسيما مذاهب حناشيل***خلاس يختلسون ما بالمخابي
صاحين في حالٍ وحالٍ مذاهيل***عن ساعةٍ فيها رخى واقترابي
وطالت حناجر لابسات الخلاخيل***اللي يحطن باليدين الخضابي
وضاع الأداب ورفعن الشماليل***يمسن دلع ما يلبسن الحجابي
عقب وسيع الكم لبسن سراويل***ترجلن وضيعن الآدابي
وغدالهن بين المسارح هلاهيل***ومذياعهن عبر الإذاعة يبابي
أدعوا معي يا صايمين التنافيل***ترى الدعاء بفطاركم مستجابي
عسى حجر سجيل مع طير أبابيل***يذهب تمرد شيبهن والشبابي
الكاسيات العاريات المماييل***المارجات وفاسدين المرابي
هذا كلام من له معاني وتأويل***واضح ولا يحتاج شرح الكتابي
ذي حالة الدنيا بجيلٍ بعد جيل***يا ما خذت من متعبين الركابي
تعز من طالت حياته بتمهيل***وياما لها بالغافلين انقلابي
ويا ما شكت منه كبودٍ معاليل***تسقيهم السم الذحاح المذابي
أصحابها يشكون منها البهاذيل***تموج فيهم مثل موج السرابي
تضعلهم حدر الحلاوي محابيل***وتنقض حلاويهم بمر الشرابي
تلحهم لح الركاب المهازيل***لحة مراويس النضا بالعقابي
تأخذ على العالم هجوم ومصاويل***إن بيتت وإن صبحت ماتهابي
حصادها بموشرات المناجيل***تقطف انفوسٍ ماعليهن احسابي
تدوس روسٍ ولا تسأل عن الميل***وكم دار قومٍ مودعتها خرابي
قضت على اللي حربهم بالنبابيل***وسيوف ورماح وشلوف وجنابي
تعد للمقبل سنينٍ مقابيل***لواقحٍ بمغيباتٍ خوابي
ترى السلامه من غثاها محاصيل***إلا من طابت نعيمه وطابي
وأدى الفروض الخمس قصرٍ وتكميل***ورجع عن التفريط وأقلع وتابي
وترك عروض الناس بالقال والقيل***يرجي من الباري جزيل الثوابي
قدام يومٍ يشوف به التهاويل***يومٍ من أهواله يشيب الغرابي
صم الحجر يجري مثل جاري السيل***ويرى الجبال اتمر مر السحابي
وإن جيب ميزانه لوزن المثاقيل***إما تبع رضوان وإلا العذابي
إما بجناتٍ ظلٍ مظاليل***وإلا بنيرانٍ لهن التهابي
تمت معانيها بجمله وتفصيل***موضحة لهل العقول اللبابي
وقضيت بالدنيا ثلاثة مراحيل***وبديت في رحلة عديم المهابي
أرجيك يامرسل خيار المراسيل***بفضل كتابٍ باللسان العرابي
يامنزله نورٍ وحكمة وتفضيل***أرجيك طيب الراحلة والزهابي
والختم تسبيحٍ وحمدٍ وتهليل***قبل الشروق وقبل وقت الغيابي
وأفضل صلاةٍ عد رمض الغراميل***على رسولٍ جاب فصل الخطابي
النمط الشجري
