صفحة 212 :الحب والغرام (مصدقة حالها الحزينة زين)
زي ما بتعرفو انو زين بنت مراهقة بتدرس بالمدرسة كل همها ما يطلع بوجهها حب شباب (وعفكرة هاد طموحها بالحياة بشرة خالية من الحب) المهم وسمعتو عن احمد (ابن جيران زين) طبعا كان حلم صبايا المدرسة لانو شب جامعي وبدرس طب وعندو سيارة بالاضافة انو كيوت …ولا تفكرو ترى احمد شايف حالو عالآخر ….المهم بيوم من ذات الايام طلعو اهل زين كلهم وتركوها لحالها بالبيت عأساس تدرس(للعلم بتقضي الوقت كله عالتلفون مع صحباتها والموضوع واحد دايما هو احمد ولبسه وسيارته …الخ)
فجأة رن جرس البيت ..زين بكل نعومة مين ؟؟مين ؟؟ ما حد برد
قربت عالباب طلعت من العين السحرية ما في حدا
استغربت وفتحت الباب وهووووووووووووب
ولا في عالأرض وردة حمرا
طبعا زين انبسطت لانو اول شي خطر ببالها انو يكون احمد ترك الوردة وهرب
طبعا ضلت تشم بالوردة لما بطل الها ريحه (شفطت الريحة كلها تقولو شفاطة هوا) ودخلت عغرفتها وشغلت اغنية اليسا بتمون وعلتها عاعلى صوت
بعد شوي
رن الجرس ومين جارتها ام سامر
زين :هلا خالتو والله ماما مو هون بشو بقدر اخدمك؟
ام سامر (بنبرة ردح ):وانا بحكي ليش فاتحتينلنا كباريه بالعمارة..روحي وطي هالمسجل
زين(بكل هبل بتناقش):بس هاد مش مسجل هاد الكمبيوتر
ام سامر(والشر بقدح بعيونها ):مسجل او كمبيوتر كلو واحد ..روحي وطيه يعني ما بتعرفي انو في ناس عم تدرس بالعمارة وفي ناس مريضة
زين(بنبرة دلع):اوكي تنت ولا تزعلي هلأ بوطيه
وزي الصاروخ راحت وطت المسجلة(او الكمبيوتر كلو واحد)
وبعد شوي رن الجرس وعطول عالباب مين ؟؟؟مين ؟؟ماحدا برد
انبسطت زين (عطول فكرت براسها قبل شوي حط وردة هلأ بكون حاطط دبدوب ) واز
في رسالة عالباب عطول لقطتها قبل ما يشوفها حد من الجيران وفتحتها
وشو مكتوب بالرسالة ( مرحبا زين انا معجب فيكي من زمان بس ما صار فرصة نحكي او نعرف بعض ازا بدك تعرفيني تعالي عالمنتزه يوم السبت الساعة 12الضهر....العاشق الولهان )
طبعا زين بلشت تحضرلها كزبة عشان تطلع يوم السبت (بتعرفو عشان يوم العطلة) المهم اجا يوم السبت وصحيت زين بكل انشكاح(يعني قمة الانبساط)
وافطرت مع اهلها وبلشت تجهز حالها للموعد العاطفي
طبعا الكزبة (ستاندرد عند كل البنات )ماما انا بدي اروح اعمل بحث مع صاحبتي ريهام
الام:اوكي بس لا تنسي تتركي رقمها عشان ازا بدك اروحك
زين :بس هي ما عندها تلفون وبخلي مامتها تروحني (هالزعرة زين طلعت بتعرف تتحجج)
الام:ماشي ماشي حبيبتي تايك كاير
زين :اوكي مام(قلبوها فلم اجنبي)
زين بخطوات ناعمة عشان لما توصل المنتزه يحكي عنها احمد نعومه
وصلت المنتزه بالوقت المحدد وقعدت عاول مقعد عند البوابة
ومين كان بالمنتزه ؟؟؟؟
احمد ومعاه ابن عمو (يحيى) واقفين بتناقشو وفجأة مشيو وقربو من زين
قربو
قربو
قربو طبعا صار وجها بالوان قوس قزح وزرعت وجهها بالارض (قال يعني خجولة)
ولا سمعت صوت بحكيلها مرحبا
رفعت راسها واز مين المعجب السري ؟؟؟
يحيى ابن عم احمد (طبعا يحيى مخوتة بنات المدرسة لانو ترك دراستو وفتح دكانة بالاضافة انو مش كيوت نهائيا)
وتطلعت ولا احمد طالع من المنتزه (نعمل زوووم عراس احمد وبشو بفكر :وانا بحكي ليش يوم الجمعة طرشتنا بالاغاني طلعت بتزبط يحيى)
ونرجع لزين ويحيى ..طبعا زين ما تطلعت فيه وقامت زي المجنونة (بعد ما راح احمد ووصل لآخر الاردن )وصيحت فيه :مش عيب عليك تعمل هيك مع البنات العمى يضربك ما اتقل دمك
يحيى (باستغراب )طيب ليش جيتي عالموعد مادام هيك ؟؟
زين :انا حرة ومشيت وتركت يحيى وراها محطم الفؤاد
وهي محطمة الفؤاد
ومن النفسية الحلوة طلعلها مجمع حب فوجهها