العودة   حوار الخيمة العربية > القسم العام > الخيمة الساخـرة

« آخـــر الـــمـــشـــاركــــات »
         :: كلمات جذر أمل فى القرآن (آخر رد :رضا البطاوى)       :: كلمات جذر أفق فى القرآن (آخر رد :رضا البطاوى)       :: نقد كتاب حقيقة الحجاب وحجية الحديث لمحمد سعيد العشماوى (آخر رد :رضا البطاوى)       :: نقد كتاب الاعتبار وأعقاب السرور لابن أبي الدنيا (آخر رد :رضا البطاوى)       :: فرية الاغتيالات الفردية فى الروايات (آخر رد :رضا البطاوى)       :: نقد كتاب سر الإعجاز القرآنى للقبانجى (آخر رد :رضا البطاوى)       :: الآن فى القرآن (آخر رد :رضا البطاوى)       :: آل كابوني (آخر رد :ابن حوران)       :: نقد كتاب الحوض والكوثر لبقي بن مخلد (آخر رد :رضا البطاوى)       :: تحميل لعبة أميرة الديكور بيت الدمي... (آخر رد :أميرة الثقافة)      

المشاركة في الموضوع
 
خيارات الموضوع بحث في هذا الموضوع طريقة العرض
قديم 24-09-2010, 05:03 AM   #1
عين العقل
عضو مشارك
 
الصورة الرمزية لـ عين العقل
 
تاريخ التّسجيل: May 2010
الإقامة: مصر
المشاركات: 606
Arrow حكاية البت باتعه ........

البت بتعه للشاعر آمين الديب

البت باتعه... بنت زيد عبد الصبور
اللي أمها يوم عرسها
كان عفشها... حلّة وبابور
ومعاه كمان صندوق خشب
كان أصله سحارة صابون
فيه بنستين والمكحلة
ومراية والفلاية والملقاط
وحجر وليفة ومبخره
وقزازة كان فيها البخور
وجوز صحون
ومنٍخُلين..
والطشت والقروانه والغربال..
ومقشّه ليف...
ومقشتين عرجرن
وزير وزلعة وقلتين وماجور
وحصيره من سوق التلات
ولحاف بإيدها منجداه
ومخدتين
والوش كان دمُّور
في الانفتاح
علي رأي صاحبي ولانبطاح
وفتحنا مصر سداح مداح
ونسينا حي علي الكفاح
والشعب محكوم بالسلاح
اتلخبطت كل الأمور
وقيم كتير
وعادات كتير اتغيرت
من ضمنها غًلو المهور
البنت دًي
بنت أم باتعه
مش عاجبه حد في مشيها
إكمنًّها.. مشيت طريقها لوحدها
والأسرة غابت عنًّها
مشغولة عنها بعبئها
سايبينها هيًّ وشأنها
وإكمنًّها مستهدفه
الأجنبي ومعاه غبي
فكّر لها
قال أولا:
ترفض معيشة أهلها
ترفض أوامر ربها
ترمي الحياء والانتماء ورا ضهرها
تقطع جدورها بنفسها
أوعز لها
إزاي حتعرض لحمها
وتبان مفاتن جسمها
من ضفرها.. لأعلي خصله ف شعرها
عمل الصالات... تعرض موضات
والاعلانات... ماليه الشاشات
بالشنبوهات والتسريحات
وحاجات كتير فرحت بيها
تاهت ونسيت نفسها
وتكلًّمك ربع الكلام بالأجنبي
وتقول هالو...
بنت أم باتعه تقول هالو
مرسيه يا شوشو وثانك يو
وكَمٍ يا توتو وياللا جو
وكبار شيوخ المسلمين
ما عرفش ليه مًتلجًّمين
والمسئولين... فتحوا الببان علي وًسعها
قام قال سلامة ألمًّها
يمكن تغيّر فكرها
ترجع لدينها وربها
وتعيش حياتها بحلوها وبمرها
راح لـ أمها...
يخطبها منها وقال لها

__________________

اللهم جنبنا لفتن ماظهر منها وما بطن


لا تجعل الإختلاف فى الرأى يفسد للود قضيه
عين العقل غير متصل   الرد مع إقتباس
قديم 24-09-2010, 05:12 AM   #2
عين العقل
عضو مشارك
 
الصورة الرمزية لـ عين العقل
 
تاريخ التّسجيل: May 2010
الإقامة: مصر
المشاركات: 606
إفتراضي

بصراحه بنتك..
عاوزه حد يلمّها
وأنا قدّها
قالت: وماله
البنت يلزمها الجواز
شخشخ جيوبك.. واشتري ياللا الجهاز
قال: اطلبي...
قالت: تجهز شقه.. قد أربع إوض
أحسن نابوليا في البلد
وتجيبها من دمياط
وتجيب نجف من غير عدد
والمكنسة بشفاط
والدًّش قبل الدُّش
والفديو والبوتاجاز
وتجيب لها تلاجة ستاشر قدم
وتجيب لها قبل الجواز...
الفرو والمحمول
وتجيب لها غسالة فول
أنا قصدي فول توماتيك
شقتها كاملة..
زي أي بوتيك
وتجيب لها قبل الجهاز
الشبكة طقم من الدهب
أنا مش حاقولك ألماظ
وتجيب لها فستان زفاف
من غير كمام من غير كتاف
علشان يبين صدرها
وتبان مفاتن جسمها
وتجيب غوازي تزفها
واللي اسمه إيه شهر العسل
في الشرم واللا الغردقة
وبلاش أمور البعزقة!!
آدي مطلبي
إن كنت قادر مهرها
قرَّب لها
أنا مش حاميّل بختها..
قال: يا أم باتعه حاجيب منين!!
أنا لاني راجل مرتشي
ولا أحب أجيب بالدّين
ولا أرضي بالتقسيط..
الطاق بيبقي طاقين
ويكتّبوني شيكات
أو أمضي علي ايصالات
علي إنها امانات
وحكاية مش هيّ
لو بس فات شهرين
مادفعتلوش قسطين
بدل المحامي اتنين
حايجيب له رفض الشيك
ومصيبه وقضيه
ومش حاقولك عالقرف
وحاجات مخلًّه بالشرف
اما البوليس والمحكمه
حابقي ف نظرهم منحرف
وباكسر القوانين
شوفي يا ام باتعه
أنا عندي شقه محندقه
معقوله ماهش ضيقه
فيها يادوب أوضتين
وعملت جمعيه
مع ناس أماره زيكم
وقبضتها ألفين
وادي اللي عندي وقلتلك بصراحه
وبإذن واحد أحد
ربًّك حايفرجها..
وباتعه حتريَّحك.. وتعيش مرتاحه
قالت له: قم من هنا
قم فضها سيره
أنا احترمتك.. عشان الأهل والجيره
بتقولي الفين جنيه?!!
وانا اللي قال بافتكر..
باتعه حاتخد بيه
حافظ علي كلمتك يا اهبل..
وخلًّيك زوق
دي باتعه طول عمرها
دايما تبص لفوق
لاحمر ولاخضر
وشي محزَّق وبنطلونات
والشعر فوق كتفها سايح
وفي الكوافير
مش كل طير يندبح
خد دش وانت تفوق
وتفوق لنفسك
وتتكلم كلام موزون
وفرضنا انت اللي عاقل
والمستمع مجنون!
ألفين جنيه للغوازي واللا للمأذون?!!
فيه ناس كتير زيكم مش عايشة في الدنيا.
مابتسمعوش الرداوي.. واللا تلفزيون?!!
شفت اللي بيقدمه الحاج متولي?!!
الشقه بالعفش كامله..
وفلوس كتير في البنك
كتبه لعروسته..
دَا غير اللبس والمصاريف
شايفاه بعيني
ولا واحد غريب قالًّلي
كل المسلسل تابعته دقيقه بدقيقه
والحاج متولي إلاهي لم يشوف ضيقه
راجل صحيح مًقٍتًدًر
كل البنات عاوزاه
وباتعه بنتي..
إلهى يكون نصيبها معاه
مش جاي تقولي الشباب !!
أنا ناقصه هَمٍ تقيل
قال: يا ام باتعه اسمعيني
كل دا تمثيل
قالت له: ده قصر ديل
وبلاش كلام فاضي
الشعب راضي
مافيش غيرك عامل لي تقيل
ما تكونش ماهر يا شاطر
واسم أبوك عطار
والشاي علي النار
وقاعد لسَّه عالرمله
والحلوه تيجي تلاقيك
فارش لها المنديل.?!
قال: يا ام باتعه
دي ناس بتوزع الأوهام
ساعدوا العدو بجهلهم
في الحرب عالإسلام
وأنا مش بالوم جهلهم
اللوم علي الإعلام
قالت: خلاصة الكلام
أنا بنتي مش من وقمكم
شوفولكو ناس علي قدًّكم
أنا بنتي حلوه مثقفه
حافظه الأغاني كلها.
أحدث شريط عندها.
دي لما تلبس بنطلونها الجينز
كل الشباب تجري وتخطب ودّها
ونانسي عَجرم نفسها
ما تجيش في خصله ف شعرها
ولا تيجي ضفر ف رجلها
طب والنبي...
لو شافها واحد أجنبي
ليجيب لها.
كل اللي ييجي ف نفسها
.

.
.
يتبع

__________________

اللهم جنبنا لفتن ماظهر منها وما بطن


لا تجعل الإختلاف فى الرأى يفسد للود قضيه
عين العقل غير متصل   الرد مع إقتباس
قديم 24-09-2010, 10:11 PM   #3
زهير الجزائري
مشرف
 
تاريخ التّسجيل: Oct 2007
الإقامة: من قلب الاعصار
المشاركات: 3,543
إفتراضي

قصيدة تختصر واقعنا وسبب همومنا وبلاوينا

ننتظر البقية
__________________
زهير الجزائري غير متصل   الرد مع إقتباس
قديم 25-09-2010, 11:00 AM   #4
المشرقي الإسلامي
أحمد محمد راشد
 
الصورة الرمزية لـ المشرقي الإسلامي
 
تاريخ التّسجيل: Nov 2003
الإقامة: مصر
المشاركات: 3,807
إفتراضي

بسم الله الرحمن الرحيم
بعيدًا قليلاً عن المعايير الفنية فهذه القصيدة تعد من أنواع الزجل والذي يلتزم قضايا وواقع المجتمع المصري وهو بطبيعته مباشر وبه بعض التقريرية . هذا فن هادف لأنه يتخذ من السخرية أداة لتحريك المجتمع ونشر الفكرة ، ولا يحتوي على كلمة مخلة بالشرف ولا الحياء ، بل إنه يحاول توظيف الصورة الكاريكاتورية والمصطلحات المتداولةفي الدفاع عن الوجهة التي يراها صحيحة.


وهناك قصائد لا تعد ولا تحصى في هذا السياق ومنها قصيدة للراحل بيرم التونسي رحمه الله يقول فيها :

شوفي لنا بنت حلال



جدع معلم قال لخالتك ام هلال
شوفي لنا بنت حلال تكون لطيفة و عال

بنات كتير حلوين عند اهلهم قاعدين
ما بين طبيخ و عجين و بختهم بطال

عايزها لحم فصوص مش عود قصب ممصوص
و محربقه بعصعوص و عامله روحها غزال

عايز قوام يتهز إن دزيتيه يندز
و ف كل مفصل حز يفكرك بهلال

عايز نتايه صحيح من ربع شمع تسيح
مهوش بشكل قبيح لكن بذوق و دلال

عندك بنات جمالات مقلوظين نتايات
و دمهم شربات يسكر نسا و رجال

تحققي في الزين البنت ترخي العين
دي مهرها ألفين أحطهم في الحال

أما اللي عاملة سبور و جدها بلفور
و عايزه واد دكتور خسارة فيها ريال

و لا اللي عاملة إله و شعرها قصاه
و بأكسجين صابغاه دي تجلب الإسهال

و ان جبتي واحده بكرش من الحمير ما تغيرش
مانيش واخدها بقرش و احط فوقها شوال
***
وهناك له قصيدة أخرى لو وجدتها سأرسلها إليكم بإذن الله لتعلموا أن الواقع لم يتغير بتغير الزمن وتعاقُب الحكومات والقوانين ، ببساطة ..لأنه الإنسان لأنه "كان ظلومًا جهولاً ".
***
الحمد لله وجدت هذه القصيدة التي بحثت عنها أكثر من ساعة في محرك البحث بعنوان (زواج أوروبا) : وهي التي كنت أقصدها :
زواج أوربا


يتعرفوا الجوز فى القهوة
ودعوة على غدوة وعشوة

وتانى يوم هيه وهوه
يتوجهوا ع البلدية



واكتب كتابنا يا مسجل
بدون مقدم وأجل

وفى المسا عندها ينقل
أو تنتقل عنده هيه


غرف بلادهم مفروشة
ورخيصة على قد العيشة

ينيلك يا م غويشة
ويبتليكى برزيه


تحطى مهر ابنك عشره
وعايزه فرش لكام حجره

صالون ونوم وأودة سفره
يا مولودين على طبلية


وإن كان عويشه المخطوبة
يخلى جوزها كركوبة

وتواعدى من طوبه لطوبه(*)
وكل يوم عايزة هدية


لو كنت أقول كل جوازه
فيها نكد يكفى جنازه

لكنت أنظم إليازه
مصرية بدل اليونانية

_______________
طوبه : هو أحد الأشهر بالتقويم القبطي في مصر وهو أحد شهور فصل الشتاء والمقصود من البيت أي التواعد بين طرفي الخطبة الخاطب والمخطوبة من كل شتاء إلى آخر وفي كل يوم من هذه الأيام تريد المخطوبة هدية ..كناية عن غلاء المهور وطغيان تقاليد المباهاة في الزواج .
__________________
هذا هو رأيي الشخصي المتواضع وسبحان من تفرد بالكمال

***
تهانينا للأحرار أحفاد المختار





آخر تعديل بواسطة المشرقي الإسلامي ، 25-09-2010 الساعة 11:59 AM.
المشرقي الإسلامي غير متصل   الرد مع إقتباس
قديم 26-09-2010, 03:26 AM   #5
عين العقل
عضو مشارك
 
الصورة الرمزية لـ عين العقل
 
تاريخ التّسجيل: May 2010
الإقامة: مصر
المشاركات: 606
Arrow

السلام عليكم ورحمة الله وبركاته

شكر وتقدير لمن عطر هذه الصفحه بمروره
وشكر خاص للأخ الفاضل المشرقى الاسلامى على إضافاته

نكمل بعون الله

* * * * * *
أنا بنتى عوزه جدع عايق يكون كسيب
أبوه فى حزب اسمه ايه ويكون من المحاسيب
أو زى ابن ام بطه شغال على التهريب
أو من بتوع النوادى أو يكون لاعيب
الجون بمليون جنيه ويغيظ آمين الديب
قال يام باتعه الّى يرضى بالحلال هيعيش
مفيش بيوت تتبنى بالغش والتهبيش
هى الأغانى تداوى أم عين عوره!!
ولا الدول تتبنى بالفن والكوره!!
وياريتو فن بصحيح لكن مالوش قيمه!
فن الجريمه بقى على الشاشات والسيما
وعادتنا حتى القيم اتقطعت أشلاء
فقد الشباب لانتماء بس المهم يعيش
تايه ما بين الفراعنه والعرب وقريش
وعلموه لاستكانه لجل أكل العيش
وغصب عنه اتحكم بفتوه واللاضيش
عايزين نعيش ايا ام باتعه زى خلق الله
نحمى الشباب من الفتن وبلاش من المغلاه
الى انتى عرفاه حرام
بس مش شيفاه
سرق عقولنا وأخلاقنا بتليفزيون
صلح سلاسل وسحبك وانتى ماشيه وراه
قالته قوم يابن زاهيه
يابن أم عين حوله
عمّال تلئح كلام
وتعيب ثقفت السلام
هوّ انت من دوله!!!
قوم فز غور من هنا قوم غورمتحبسناش
بتجيب فى سيرة اسمه ايه
والفجر لسه مجاش
فاكر فى يوم اسمه ايه
يوم احتفال اسمه ايه
ساعة ما مات اسمه ايه
وجه مكانه اسمه ايه
عمل قانون اسمه ايه
وجه مخلى اسمه ايه
باشا فى أمن اسمه ايه
يقطع لسان اسمه ايه
لو جاب فى سيرة اسمه ايه
عقبال سلامه ا بن ايه(صاحبنا)
ويحطوه فى الّى اسمها ايه
من غير محاكمه اسمها ايه
تعقد سنين مالحال
فكرك تحوش اسمه ايه
هو اسمه ايه ينحاش
قال يام باتعه انتى ايه
قصدك تخلى اسمه ايه
يحبسنى فالى اسمها ايه
من غير محاكمه اسمها ايه
اقعد سنين مالحال
قالتله انا جبت سيرة اسمه ايه
وفرضنا قولت اسمه ايه
وما هو برضه مغلطناش
__________________

اللهم جنبنا لفتن ماظهر منها وما بطن


لا تجعل الإختلاف فى الرأى يفسد للود قضيه

آخر تعديل بواسطة عين العقل ، 26-09-2010 الساعة 04:11 AM.
عين العقل غير متصل   الرد مع إقتباس
قديم 26-09-2010, 03:42 AM   #6
عين العقل
عضو مشارك
 
الصورة الرمزية لـ عين العقل
 
تاريخ التّسجيل: May 2010
الإقامة: مصر
المشاركات: 606
إفتراضي

قالت خلاص فوضنا
ياتقوم تغور من هنا
أنا بنتى زى القمر لسه عريسها مجاش
عوزاه يكون مقتدر ويكون كبير يا بلاش
أنا نقصه هم الشباب والنفخ عل الفاضى
فاكرينى مكتب شئون هديكو بنتى بلاش
قوم فز غور من هنا فوضها سيره
والباب وراك تقفوله وتهوى فى سريرك
ووعاك تعتب هنا لو ليك كرامه صحيح
أصل الى زيك كده الدم عنده شحيح
وان كنت بالشكل ده يوم خرجتى متجيش

خرج يقول يا مسلمين
يا ولاة أمور المسلمين اللوم لمين
للمسؤلين ولاّ الحرس
يا مثقفين دقوا الجرس
ماله الجرس صابه الخرس
اوعاك تقولو ان الودان صابها الصمم
اوعاك تقولو الناس كمان زى الغنم ما بيفهموش
وبلاش تكونوابجهلكم أو حتى فى ناس منكم بينفذوا تخطيط لبوش
فتش وشوف الجرح فين
وضح وقول للمسؤلين
وبلاش من النوم فالعسل
وبلاش كسل

وياريت تكونوا القدوه وتكونوا المثل
وبلاش تعرض سمعتك للقيل وقال
وبلاش طريق الهلس والبطال
بكره التاريخ هيغربلك ويغربل الاعمال
فى ناس تعيش وناس تموت ولا تتنسيش
وناس تموت تحت النعال

وفيه كتب زى الدهب
وفيه كتب من غير ثمن يرموها للزبال
يا مثقفين فين جهدكم
والمشكله قدام عينكم كلكم
قدمكم فرصة عمركم
رقبوا البرامج كلها وتفكروا واستفسروا
القصد ايه من بثها


ومين ومين من المسؤلين صرح بها
وفين شيوخ المسلمين عشان توقف عرضها
واللوم لمين

يا كبار شيوخ المسلمين
قولوا بصراحه عل الملاء
لو واحده تعرض لحمها!!
ولا تختشيش على دمها!!!
ولا تستحيش من ربها!!!!!
مهره وسايب سرعها من غير لجام
يا كبار شيوخ المسلمين عايزين إمام
يصرخ يقول لوزارة الإعلام حرام
وبجرأه يعلن كلمته
عشان يبرأ ذمته
يعمل حساب يوم دفنته
يعمل حساب يوم الزحام
قداكم عام والزحف جاى مالعولمه والامريكان
وخلاص بدأ شد الحزام
يأيها الحكام متغيبوش عقول شعبكم وبالشرطه والإعلام
الكيل طفح وادى الشعوب بتقولكم قدامكم فرصة عمركم
قدمكم عام
يتقولوا عالدنيا السلام

تمت بحمد الله
وربنا يستر
__________________

اللهم جنبنا لفتن ماظهر منها وما بطن


لا تجعل الإختلاف فى الرأى يفسد للود قضيه
عين العقل غير متصل   الرد مع إقتباس
قديم 27-09-2010, 01:27 AM   #7
متفااائل
عضو مميّز
 
تاريخ التّسجيل: Oct 2004
المشاركات: 1,161
إفتراضي

بسم الله الرحمن الرحيم

السلام عليكم ورحمة الله وبركاته

اختي الكريمة ... عين العقل

كما وعدت ... جئت كي اكتب انطباعي كقارئ ...

حكاية البت باتعة ... احسست بعد قراءتها انها رواية وليست حكاية ...
وهي كانت تحتاج لتكثيف ... ويذكرني تكرار " ايه " في اكثر من مقطع
بشاعرة ساخرة لا اتذكر اسمها ... كانت تستخدم نفس التقنية تلك ...

حكاية البت باتعة ... ارى الشاعر قد خرج عن نطاق باتعة لنطاقات
اخرى في الحياة ... ومشاهد اخرى ... وارى ان هذا لا يخدم العمل
ولا يتماشى مع عنوانه ...

ارى وانا اسير في القراءة تفاوت غير منتظم في الموسيقى الداخلية
بين صاخب وهادئ وميت ...

كما ان الوعظ المباشر انتهى عصره ... ولم يعد من متطلبات العمل
الفني ... ربما مجاله الخطب وغيره ...

العمل كمحتوى جيد ...

وهذا مجرد انطباع ...

تحياتي وتقديري لك ...
متفااائل غير متصل   الرد مع إقتباس
قديم 27-09-2010, 01:42 AM   #8
عين العقل
عضو مشارك
 
الصورة الرمزية لـ عين العقل
 
تاريخ التّسجيل: May 2010
الإقامة: مصر
المشاركات: 606
إفتراضي

إقتباس:
المشاركة الأصلية بواسطة متفااائل مشاهدة مشاركة
بسم الله الرحمن الرحيم

السلام عليكم ورحمة الله وبركاته

اختي الكريمة ... عين العقل

كما وعدت ... جئت كي اكتب انطباعي كقارئ ...

حكاية البت باتعة ... احسست بعد قراءتها انها رواية وليست حكاية ...
وهي كانت تحتاج لتكثيف ... ويذكرني تكرار " ايه " في اكثر من مقطع
بشاعرة ساخرة لا اتذكر اسمها ... كانت تستخدم نفس التقنية تلك ...

حكاية البت باتعة ... ارى الشاعر قد خرج عن نطاق باتعة لنطاقات
اخرى في الحياة ... ومشاهد اخرى ... وارى ان هذا لا يخدم العمل
ولا يتماشى مع عنوانه ...

ارى وانا اسير في القراءة تفاوت غير منتظم في الموسيقى الداخلية
بين صاخب وهادئ وميت ...

كما ان الوعظ المباشر انتهى عصره ... ولم يعد من متطلبات العمل
الفني ... ربما مجاله الخطب وغيره ...

العمل كمحتوى جيد ...

وهذا مجرد انطباع ...

تحياتي وتقديري لك ...
وعليكم السلام ورحمة الله وبركاته

جزاك الله خير أخى الفاضل على مرورك وابداء انطباعك على الموضوع

شرفنى مرورك


__________________

اللهم جنبنا لفتن ماظهر منها وما بطن


لا تجعل الإختلاف فى الرأى يفسد للود قضيه
عين العقل غير متصل   الرد مع إقتباس
المشاركة في الموضوع


عدد الأعضاء الذي يتصفحون هذا الموضوع : 1 (0 عضو و 1 ضيف)
 
خيارات الموضوع بحث في هذا الموضوع
بحث في هذا الموضوع:

بحث متقدم
طريقة العرض

قوانين المشاركة
You may not post new threads
You may not post replies
You may not post attachments
You may not edit your posts

BB code is متاح
كود [IMG] متاح
كود HTML غير متاح
الإنتقال السريع

Powered by vBulletin Version 3.7.3
Copyright ©2000 - 2019, Jelsoft Enterprises Ltd.
 
  . : AL TAMAYOZ : .