الواد فرماوي واد جتة .. يفصل اتنين أو تلاتة من الحجم العادي .. جاي من بلدهم وناوي أذية الناس فعلا كل يوم قاعد ع القهوة يزاول اللي رايح واللي جاي .. فرماوي عامل فردة على الناس وكل يوم عركة مرة مع الواد بندق سواق التوك توك ومرة مع الأسطى نبيل المنجد ومرة مع الشيخ فتحي بتاع الجرايد يعني ماخلاش .. أي حد يدخل القهوة لازم يوجب مع فرماوي واللا تبقى وقعته مقندلة ..
لو فكرت تسأله إيه اللي جابك يا فرماوي لوجه بحري يرد عليك إنه جاي ياكل عيش .. فرماوي فعلا جاي بواسطة جاي ياكل عيش .. مش أي عيش .. دا عيش الناس الغلابة اللي بتعاني في الطابور من قبل الفجر وحاجزين مكانهم وإذا جه فرماوي مايقدر واحد يقول ده مكاني .. ولا واحد له حق ف أي حاجة غير لما فرماوي ياخد حصته كاملة .
السيد فرماوي له حصة بعشرين جنيه كل يوم ودي تعادل حصة 15 أو 20 عائلة يرضي مين الكلام ده يارجالة ؟ .. ومين أعطاه السلطة يعمل كده ؟؟ ومين وراك يا فرماوي ؟؟؟ أسئلة كتيرة جدا بتدور في أذهان الناس .. ساعات نقول يمكن تبع سلطة كبيرة في البلد ؟ بس لما نشوفه وهم جايين ياخدوه القسم نقول غير كده .. نرجع نقول يمكن قريب لمراقب التموين المشرف على الفرن ؟ لما بيكون المراقب موجود فرماوي مابيظهرش نهائي ..
أخيرا اكتشفنا إن السيد فرماوي جاي من بلدهم بدعوة رسمية ( تعاقد شخصي ) مع صاحب الفرن .. أبضاي يعني أو بودي جارد زي مايقولوا بس لحساب مين ؟؟؟ الله أعلم .
تعرفوا 20جنيه عيش يعني كام رغيف 400 رغيف .. أتاري فرماوي عنده مشاكل كتير ف البلد ولما كان الحاج حلمي صاحب الفرن في البلد قدم حل لمشاكل فرماوي وهو إنه يشغله معاه ويساعده في تسوية مشاكله وسداد ديونه المتلتلة .. والحاج حلمي كلمته مسموعة في البلد – بس على حساب مين ياحاج ؟؟
فرماوي تسمع مكالماته في المحمول تقول راجل أعمال .. تشوف منظره يصعب عليك تبقى عايز تمد إيدك في نص جنيه وتعطيه .. تشوفه وهو مفتري يبقى نفسك تتملك منه وتعدمه العافية .. عارفين فرماوي بيأكل مين بالعيش ده كله .. بيأكل البهايم اللي ف بلدهم كلها .. وبقى أكبر مصدر لعلف البهايم في الصعـــيد الجواني ( عيش الناس الغلابة ) مابقاش يتكلم إلا بالطن .. والطلبية .. والسيولة وحاجات كتير كده زي الناس الكبار ... ترى لو كل فرن اتعاقد مع فرماوي واحد ... الناس دي ح تاكل منين ؟؟ ... ارحمنا يا فرماوي
فكر وحبر / ياسر سنجر
فرماوي وأزمة رغيف العيش
النمط الخطي
