في أوااااخر السؤال

[ضياء الدين البري]

السلام عليكم .. مجرد رأي

كلام من قلبي

في أواااخر السطر

..........

وفْ آخر السطر
وبعد مافات الأوان
سكت السؤال
ولقيت اليأس فْ لحظه
من غير بداية معرفه سابقه
جاني
عايز يصاحبني
رفضته
ولقيته مُصِرْ
هاجمته
فجأه واتداره فْ أحاسيسي
كائنه اتمكن مني
عايش وبيعزف جوّايا
علامات استفهام
تايهه
جوّا العتمه بتطرح فيّ
غصْبٍ عني حتي الكراكيب
واللي اتكسرت جوايّا من الخوف
زايد خوفها
والنبض الباقي في جنابي
بيهاتي
بيزعق بعلوْ الصوت
يستنجد
عايزها تفوت
تلم اخوتها وتعـدّي
وان قـِدرت ، تنزعني
من قبل ماشوف
كل إيدين الليل ممدوده
وإن الدنيا رافضه وجودي
ومفيش فايده
حتي دموعي
ناويه تواسي الخوف
جوّا عيوني
لحظه ، ولاقيتها بتصرخ
أتاري جفوني
م الخوف مكبوته
ومن كتر الحزن
نشفـت
شققت من كتر الصهد
اللي هناك ، عايش وبجـد
وسمعت النبض كأنـه الرعد
والفكر الشارد مني
متخبي فْ داخلي
يتحدي كياني
ولمحت النبضه اللي مازالت
عايشه فْ إحساسي
جيّـاني بتلح عليّ
تصرخ وتقوللي..
تنصحني
تزرع جواي شعاع
يواسيني
يونسني
متمسك بيّ
يصحبني وفْ كل ظروفي
رغم التوهه ، سكناني خطوه بخطوه
وشايف مرارها فْ سكتي
وتتباهي علي جبيني
وفْ كل نظره
تشوفها عنيّ
أنادي وبعزم مافيّ
فينك ياحياه..؟
وياريتها تسمع وتلبي
تلملم نبضاتي التايهه
يمكن تلحقني
أصعب عليها
تسامحني
تسكن جوايا ومن تاني
تضمني
تسكّت ألمي شوية وقت
وفْ لحظه
لقيتها افتكرت عنواني
وجت تسألني
حسيت انا قلبي يتخبط
يوجعني
وخجلانه آهاتي
من كتر القسوه
اللي شايفاها عاشقاني
ولو كنّـيت ،
أسمعها تكشر
تزعق
ولما بتسكت ، تسمع
من صدي صوتها
دقة قلبي وصوت نبضاتي
زعلانه مني
وبرضه الاقيها بتحاول
تنشف لي جبيني
تزرع علي خدودي الأمل
من بعد ماظهر
طيف السكات
شافت جفوني بتتمايل
بتتاوب من التوهان
عشان حياتي كلها
عايشه ومكنونه
جوّا طيات القدرالمباح
وأناتي بتدّور سواقيها
وتقرّب مني
تديني السقوه
من قبل ميعادها
وتفرد جناحتها
عالأيام الباقيه فْ عمري
واللي انا عايشه
وأرضه شراقي
وبرضه الاقيها
ماده إديها بتـدوّر
بيـن أنقاض أيامي البور
عن دمي المستباح
عايزه تلاقي أي بواقي
في أي طريق متداري
بين جدران الحياه
تلمح فيه ، أي نسمة أمل
ممكن تخطفني
تخفف عني
تشيل الغمه عن جفني
لجل مافوّق ، أحاول ادوّر
وافضل اجرّب
أطل واشوف
يمكن الاقي جواب
علي السؤال الساكن
في أحلامي
في أواااخر السطر

.......

أشكركم

وللجميع تحياتي