كلمات عزفت على أنغام الوتر

ياسمين · 16-10-2008, 05:02 AM

بوابة الحلواني.....

كلمات سيد حجاب

بندق ندق بوابة الحياة بالإيدين قومى

قومى افتحى لولادك الطيبين قومى

و اللى بنى مصر.. كان فى الأصل حلوانى

و عشان كده مصر يا ولاد حلوة الحلوات

وادى و بوادى و بحور و كفور و موانى

توحيد و فكر و صلاة

تراتيل غنا و ابتهالات

و كل ده فى مصر يا ولاد حلوة الحلوات

اللى بنى مصر كان حلوانى يا ولداه حلوانى

اسمه على بوابتها لا زال و لا زايل

ساعة الهوايل يقوم قايل

يابلداه

و ييجى شايل

هيلا هوب شايل .. حمولها و يعدل المايل

و عشان كده مصر يا ولاد حلوة الحلوات

بحلم يا صاحبى

و أنا لسه بأحبى

بدنيا تانية و مصر جنة يا صاحبى

و آجى أحقق الحلم

ألقى الموج عالى عالى طاح بى

و نعود سوا نطوى الأنين بالحنين

و عشان كده مصر يا ولاد حلوة الحلوات

ياسمين · 16-10-2008, 05:17 AM

قالو زمان دنيا دنية غرورة

و قلنا و اللي تغره يخسر مصيره

قالوا الشيطان قادر و له ألف صورة

قلنا ما يقدر عللي خيره لغيره

ايه معنى دنيتنا و غاية حياتنا

اذا بعنا فطرتنا البريئة الرقيقة

ازاي نبص لروحنا جوا مرايتنا

اذا احنا عشنا هربانين من الحقيقة

قالو زمان دنيا دنية غرورة

و قلنا و اللي تغره يخسر مصيره

قالوا الشيطان قادر و له ألف صورة

قلنا ما يقدر عللي خيره لغيره

و مين نكون ان بعنا يومنا و ماضينا

و ليه نعيش اذاكانش بكرة يراضينا

و ازاي ننام من غير ما نحلم ببكرة

و بكرة ده منين ييجي الا بايدينا

قالو زمان دنيا دنية غرورة

و قلنا و اللي تغره يخسر مصيره

قالوا الشيطان قادر و له ألف صورة

قلنا ما يقدر عللي خيره لغيره

ياسمين · 16-10-2008, 05:50 AM

من هو سيد حجاب؟؟

هو شاعر الفقراء .. ابن مدينة الصيادين الذي اصطاده الشعر فأوقعه في شباك الكلمة .. رائد من رواد جيل الستينات ..

صاحب أجمل كلمات أغاني للأعمال الدرامية .. هو الساحر............

ولد في محافظة الدقهلية بمدينة المطرية ، مدينة الصيادين التي تحتضن ضفاف بحيرة المنزلة ، المدينة الصغيرة ذات الطبيعة

الجميلة الهادئة .. مجتمع الصيادين البسطاء الذي أثر كثيرا جدا في شخصيته .. جلسات المصطبة الشعرية التي كان والده

يصحبه إليها فيستمع لحكايات وأشعار الصيادين البسطاء ويدونها ..

كان ديوانه الأول ( صياد وجنية ) وليدا لتلك البيئة ، وشهد حفاوة بالغة من النقاد والمثقفين الذين وصفوه وقتها ب (لوركا )

العرب .. لكن تحولا كبيرا بعدها شهده شعر سيد حجاب الذي أزعجه أن عمله الذي قصد به أبناء بلدته الصيادين البسطاء لم

يصل أيا منهم .. .. يقول سيد حجاب عن تلك النقلة ""حدث هذا التحول حين نشرت ديواني الأول صياد وجنية╗ ولاقى

حفاوة كبيرة لكن ذلك كان في إطار الكلام المجاني. لم يجد هذا الديوان حظه من القراءة ,،فالذين كتبته لأجلهم لم يقرأوه..

آلمني الأمر كثيراً.. شعرت بأنه من العبث أن تكتب شعراً في وطن تغمره الأمية. عندئذ بدأت أتوجه إلى الناس. "" ..

اتجه سيد حجاب للكلمة المغناة ليصبح شاعر الفقراء والكادحين ..يستمد كلماته كما يقول ""من حياتي من خبرتي وداخلي، من

محبتي الغامرة لبسطاء شعبي بالتحديد، من واقعي المصري والسكندري أيضا، وحياة الفقراء والغلابة.""

سأتوقف قليلا عن الحديث عنه لأعرض بعضا من أعماله الساحرة ..

يقول في قصيدته الساحرة التي قدمها لمسلسل الأصدقاء

آدي إيدي مِد إيدك ...

جرحي جرحك عيدي عيدك

ود دافي .. نبع صافي ...

شيء كأنه نيل موافي

من وريدي و من وريدك

يا صديقي مِد إيدك

يا صديق عمري يا صاحب ذكرياتي ...

إنتَ كنز أيامي تحويشة حياتي

و مراياتي اللي باشوف جوّاها ذاتي ...

و تواجهني بعيبي تكشف سيئاتي

تِقسى بحنان و استزيدك ... يا صديقي مِد إيدك

أصدقاء و الود موصول فوق زمانّا ...

بيه آمنّا و له آمنّا و فيه أمانّا

بيه على الدنيا و ع الدهر استعانّا ...

و إن زمنّا خانّا و في لحظة طعنّا

تستعيعدني و استعيدك ...

يا صديقي مِد إيدك

وقد أبدع في ختام كلماته حين قال:

آدي يدّي مد يدك ...

قد ودك قلبي ودّك

د انتَ بعد الأهل أهلي ..

و اذا يوم قلبك ندهلي

حتلاقيني بقلبي عندك ..

يا صديقي مد يدك

يا صديق عمري و أحلامي و عذابي ...

في ليالي فرحتك عامل حسابي

في ليالي وحدتي بتدق بابي ..

و عمر باب قلبي ما صدّك

يا صديقي مد يدك

أصدقاء و الود موصول فوق ظروفنا ..

مهما نبعد مهما طوفنا مهما شفنا

في ساعات شدتنا و قلقنا و خوفنا ...

تستعيدني و استردّك

يا صديقي مد يدك

ياسمين · 16-10-2008, 05:58 AM

و عن القاهرة يقول

سيد حجاب

هنا القاهرة الساحرة الآسِرة

الهادرة الساهرة الساترة السافرة

هنا القاهرة الزاهرة العاطرة

الشاعرة النيّرة الخيّرة الطاهرة

هنا القاهرة الساخرة القادرة

الصابرة المنذرة الثائرة الظافرة

صدى الهمس في الزحمة و الشوشرة

أسى الوحدة في اللمة و النتورة

هنا الحب و الكذب و المنظرة

نشا الغش في الوش و الإفترا

هنا القرش و الرش و القش و السمسرة

هنا الحب و الحق و الرحمة و المغفرة

و انا ف قلب دوامتك الدايرة بينا

بصرّخ بحبّك يا أجمل مدينة

يا ضحكة حزينة .. يا طايشة و رزينة

بحبّك و اعفّر جبيني في ترابك

و اعيش في رحابِك و أقف جنب بابك

جنايني أروي بالدم وردة شبابك

يا زينة جنينة حياتنا اللعينة

بحبّك يا بنت اللذين

بحبّك

ياسمين · 16-10-2008, 06:27 AM

ومن أحب الكلمات إلى قلبي وأرقها لحنا

وهي إهداء خاص مني إلى جميع أعضاء الخيمة

زي الهوا

زي الهوا ساير وخيال الطيف

أحلى سنين العمر بيننا تمر

يا نعيش هوانا حلم ليلة صيف

يا تتوه خطانا في ليل شتانا المر

ولما تتلاقى الوشوش مرتين..

مبيتلاقوش يوم اللقا التاني..

عمر الوشوش ما بتبقى بعد السنين

نفس الوشوش دي بتبقى شئ تاني

بتبدل الأيام ملامحنا

ترعشنا.. تنعشنا.. تشوشنا

يا ترى اللي بيعيش الزمن إحنا

ولا الزمن هوا اللي بيعيشنا..

ياسمين · 16-10-2008, 06:42 AM

إسكندرية الصبية

سيد حجاب

إسكندرية الصبية ..بنيَة امبارح

اموت فى عودها السرح..وف رمشها السارح

شرح هواها ..وشعورها..شبك وليل طارح

ع البحر..والبحر فى ننى العيون بارح

دى إسكندرية عروسة بحرها المالح

يا إسكندرانى.. يا بستانى فى جناين الريح

ياقانى جواك سما..وشمس..وغنا تباريح

أحلى ما فيك يا وله.. انك جدع وصريح

وطيب القلب ..تضحك..حتى وانت جريح

وان عاندك الموج..تداديه انت وتصالح

دى اسكندرية عروسة بحرها المالح

يا اسكندرانيه ..يا مياسه محنيه

يا بنت بحرى يا ساكنه قلبى وعينيا

فى الحر..ع البر تجرى..مستأنية

يوشك البحر مية..ترشي حنية

ع الدنيا..ويصيب حشايا سهمك الجارح

دى اسكندرية عروسة بحرها المالح

شى الله يا أباصيرى..نظرة يا ابا الدردار

مدد يا مرسي..وكراماتك ياسيدى ياقوت

خيركو علينا..يوافينا فى مينا ..وف دار دار

بركاتكو حلت علينا..وع العيال والقوت

وعلمتنا ما نمشيش الا فى الصالح

دى اسكندرية..عروسة بحرها المالح

يارب ..وافرجها ع المبلى و ع المحووج

وكون سندنا..ومددنا..ف السنين العوج

واكتب لنا نعودلها..والحب بينا يسود

ويعود قمرها يلالى فى الليالى السود

ونحق حق الله فيها..ونعدل المعووج

دى اسكندرية عروسة البحر..ست الموج

كفك يا صاحبى يا فارد فى الهوا قلوعك

يا اسكندرانى ..يا طاوى البحر فى ضلوعك

لما الليالى يدوروا..ومايدروا بنا

هيه الفناره اللى تهدى قلوبنا لدروبنا

وعشقها ف دمنا..ومع حلمنا..ممزوج

دى اسكندرية عروسة البحر ..ست الموج

ياسمين · 16-10-2008, 06:54 AM

الوسية

مين للى قال الدنيا دى وسية

فيها عبيد مناكيد وفيها السيد

سوانا رب الناس سواسية

لا حد فينا ولا يزيد ولا يخس ايد

جينا الحياة زى البنات أبرياء

لا رضعنا كبر ولا اتفطمنا برياء

طب ليه رمانا السيف على الزيف

وكفن وجهه غير بالصدق والكبرياء

عيش يا بن آدم بكر زى الشجر

موت وانت واقف زيه فى مطرحك

ولا تنحنى لمخلوق بشر أو حجر

وشب فوق مهما الزمان جرحك

مين للى قال الدنيا دى وسية

فيها عبيد مناكيد وفيها السيد

سوانا رب الناس سواسية

لا حد فينا ولا يزيد ولا يخس ايد

إيناس · 16-10-2008, 12:07 PM

الله ... الله ... الله
كالعادة إنت ياسمين، إختياراتك حلوة وجميلة
كل مرة أحس وكأنك تملكين كلمة السر والخريطة المفقودة والوحيدة والتي تملكيها إنت لوحدك لتدخلي روضة جمال وسحر الكلام وتأتين لنا بعقود ماس من العبر تنثرينها علينا لنتمتع بجمالها ...
فما أجمل ذوقك وإختيارتك يا وردة الياسمين

ياسمين · 18-10-2008, 01:40 AM

أنوستي الرقيقة

لك بالغ الشكر مني وفائق التقدير على تشجيعك لاختياراتي

فأنت من تملكين حسا جماليا عاليا إذ تتابعين كل جديد

ولا تبخلين على الجميع بمرورك الطيب

شكرا لك على نبل مشاعرك و تقبلي مني أجمل التحيات وأطيب الأماني

ياسمين · 25-10-2008, 02:16 AM

كلمات

سيد حجاب

و ينفِلِت من بين إيدينا الزمان

كإنه سَحبة قوس في أوتار كمان

و تنفرط الايام عود كهرمان

يتفرفط النور و الحنان و الأمان

و ينفلت من بين إيدينا الزمان

الشر شرق و غرب داخل في حوشنا

حوشوه لا ريح شاردة تقشقش عشوشنا

حوشوا شرارة تطيش تشقق عروشنا

و تغشنا المرايات تشوش وشوشنا

و تهيل تراب ع الهالة و الهيلمان

الغش طرطش رش ع الوش بوية

ما درتش مين بلياتشو أو مين رزين

شاب الزمان و شقيت .. مش شكل أبويا

شاهت وشوشنا تهنا بين شين و زين

ولسه ياما و ياما حنشوف كمان