حـكــــايـة مـــسـعـــــود
عــود اللـيـل
كان يامكان مشي بعيد فهاد الزمان
بدات حكاية انسان ومعها بداو الاحزان
كان يامكان فقرية جوايه افران
راجل شارف هارف غادي على حمارو زربان
سمع غوات دري صغير من بعيد بين الويدان
تبع الصوت زربان حتى الدري ليه بان
دري صغير يلاه خارج من كرش امو
شنو هنا كيدير؟ و فهاد البرد زراق فم
وقف قدامو لحمار تخلع من لغوات
هز قدامو ،زطم على رجل الدري.. مشات
وهكذا بدات حكاية مسعود
مسعود لي ديما فالنحس موعود
ودارت الأيام و كبر مسعود فالجوع
وعليهم كترو لمصايب وولا كلشي مقطوع
حتى جا يوم النحس لكبير المرفوع
النحس لي على مسعود مطبوع
كان فعمرو خمس سنين فاق فالليل وحيد
كان صباح نهار التنين فاق فرحان و سعيد
ناض بغا يجرب المين مشا قلب جبد لوقيد
شعل العافية فلبطاين حرق الشراف نهار العيد
وعلاش يا دنيا معكسة مسعود؟
الباب لي دقو يلقاه مسدود
علاش ديما هو بالنحس موعود؟
وعلاش يا دنيا ..علاش غير مسعود
مشا مسعود من بعد لشي خيرية
لقى الدراري بحالو في مكناس حدى حمرية
كانت عندو مديرة قبيحة سميتها السعدية
خمسنين ما شمو فلوس نتاع الجمعية
خمسنين مسعود عاش محكور
لي جا كيسلخو كاع ولا وجهو محفور
عيا ما يقرا الهم مافهم والو حنطور
خمس سنين و النحس عليه كيدور
واحد النهار طلعليه الدم ضربها بهربة
البرد فالليل بحال السم ..بات بوحدو فالرحبة
علي بو لحية غادي يخدم بانت ليه فيه اللعبة
داه ورا زبالة وأم و حكرعليه وندم
وعلاش يا دنيا معكسة مسعود؟
الباب لي دقو يلقاه مسدود
علاش ديما هو بالنحس موعود
وعلاش يا دنيا علاش غير مسعود؟
بقا مسعود مشمكر حتى دار 16 عام
تقدو كتافو و كبر وتعلم لكلام
وبلغ حتى هو وبداو يبانوليه فالمنام
وخا حتى مسكين حول ونيفو زايد لقدام
تعقد مسعود كلشي كيقوليه انت مجرتل
واحد النهار دايز بانت ليه خدامة كتخمل
شيراتليه و ضحكت.تـلف ومسكين تعكل
بقا كل نهار عاصر..حاضي الشرجم يتامل
نزلات شي مرة عندو قالها سميتو مسعود
كانت مزروبة مسخرة دارت معاه مع التسعود
بقا كيتسناها مسمر ..فيه الخلعة مرعود
نزلات جاية قاطعة..خرج فيها الطوبيس كود
وعلاش يا دنيا معكسة مسعود؟
الباب لي دقو يلقاه مسدود
علاش ديما هو بالنحس موعود
وعلاش يا دنيا علاش غير مسعود؟
تصدم مسعود و جلس يدور فالزناقي
يتحشش و يشم و يموت بالجوع ..نحسو باقي
شافو راجل اخواني داه معاه لجامع راقي
قالو كول ونوض تصلي باش للنور تولي لاقي
دار اللحية مسعود و حتى هو تعلم يهضر
عجبو الحال وولا ينصح الناس و يتمختر
ولا يدور فالجوامع .يجمع الدراري و يدبر
حتى جا النهارلعرف بلي جات نوبتو فالعسكر
ركب مسعود فالطيارة فرحان غيشوف بلادن
وصل و عطاوه السلاح وقالولو بقا فبلاصتك راكن
وماتخافش لي جا ضربو..راك للجنة ضامن
جلس مسعود يومين ما يتحرك تما ساكن
سها مسعود و هز الراس و عطاه الميريكاني
فاق لقا راسو فالحبس ومعاه باكستاني
يشوف فيه يتبسم فرحان و بعينيه قاني
بالفقسة غوت مسعود لقاه علي بو لحية تاني
وعلاش يا دنيا معكسة مسعود؟
الباب لي دقو يلقاه مسدود
علاش هو ديما بالنحس موعود
وعلاش يا دنيا علاش غير مسعود؟
دوز مسعود مع علي بو لحية عام صعيب
ومن كترت ما منحوس ردوه ميريكان للمغرب
رجع مسعود تالف مخلوع فبلادو غريب
رجع للزنقة و الشوماج وولا من لحماق قريب
بقا دايع كيدور واحد النهار لقا راسو فطنجة
تلاقى مع محمد كيدير لحلاقي بالكمنجة
بدا يدوره يغني معاه..يجمع لفلوس فطريقو
قالو محمد ايلا كان باغي يقدر لاسبانيا يحركو
فرح مسعود و قال من بلاد النحس غيضربها بسلتة
مشا مع صحيبو حتى قربو للحدود مع سبتة
كاميو د الحوت واقف مسعود. دخل مسعود سد محمد
ومات مسعود فالطريق وسط التلاجة مجمد
وعلاش يا دنيا علاش مات مسعود؟
الباب لي دقو لقاه مسدود
علاش ديما كان بالنحس موعود؟
وعلاش يا دنيا علاش مسكين مسعود؟
__________________
"Noble sois de la montaña no lo pongais en olvido"
|
النمط المتطور