شكرا سيدتي الأولى على الزيارة

[olaegy]

- ياعم أنا راجل أرزقي باعيش يوم بيوم , واليوم اللي باقفل فيه الورشه عيالي ما يلاقوش اللقمه ياكلوها , وانا ذنبي إيه في الزياره دي واستفدت منها إيه ؟
* طب اسكت بقى أحسن أعمل لك قضية إشغال طريق وقضية تعدي على موظف عام
- دا رمي جتت بقى .... هي ناقصه دي الحكايه ماشيه بطلوع الروح ... روح يا شيخ الله ....
*كده انت دخلت في الغويط .. روح بيتك واقعد في وسط عيالك أحسن لك واقفل عليك بابك , وما اشوفش وشك في الشارع لحد ما الزياره دي تخلص على خير , أنا بقى لي كام يوم ما نمتش ومش مستحمل كلمه من حد .
- أمال هي الست جايه تزور مين ؟.. مش المفروض هي جايّه علشان الشعب , ماهو احنا الشعب , انتوا مستعرين منا ليه , هو احنا بقينا عوره بتدارونا عن عيون الزوار والمسئولين ؟.. ما تسيبوهم يشوفونا زي ما احنا يمكن قلبهم يحن علينا ويرخصوا الأسعار ويخففوا الضرايب وياخدوا بالهم مننا شويه .. حسبي الله ونعم الوكيل فيكم ياشيخ .
*ياد روّح بيتك واقفل عليك بابك بعد ما تحط فراشه تداري ورشتك العفشة دي وما توجعش دماغي أنا مش ناقصك , مانا في الهم زيّك .
- أمال هي سيادتها هاتقابل مين بقى في الزياره دي , إذا كانت الميكروباصات اتمنعت والعربيات اللي جاية من الأرياف رجعوها , والبياعين أخدوا منهم البضاعه ومشوهم , وما عدش حد في الشوارع ؟
- ياد افهم .. هي ها تروح المحافظه وتقابل أعضاء الحزب , والقيادات المسئوله علشان تناقش معاهم أحوال الناس الغلابه اللي زيك .
Technorati Profile * طب ما تناقشنا احنا على الطبيعة وتشوف أحوالنا زي ماهي من غير زواق ومن غير دهان الأرصفه وزرع الشجر , ومن غير تخبية الناس اللي بجد .. طب تصدق أنا ما عرفتش المنصوره النهارده .. دي كأنها بلد تانيه غير اللي احنا عايشين فيها , ويبقى كده الست كأنها بتزور بلد تانيه غير بلدنا .. ما تسيبوها تشوف البلد وهي عمرانه ومليانه بالناس وتشوف الزحام والأسواق والبيّاعين السرّيحه والشحاتين , والعيال اللي نايمه على الأرصفه وتحت الكباري , مش همّا دول احنا .. ها نتبرى من نفسنا ليه .. ما تسيبوها تشوفنا زي ما احنا .
- بقى انت عايزها تشوف منظرك الجربان ده وانت واقف تشتغل في ورشتك انت والعيال الهفتانين صبيانك ؟
*هو انا مش من أهل البلد دي ولا إيه ؟ ... يعني علشان فقير وهدومي مزيّته ؟
وانتهى الحوار بأن وقف الأصطى "شحاته" ليعلق لافتة الترحيب يخفي بها ورشته القديمة , ثم يذهب إلى بيته قبل أن يأتي الموكب , وقد أخذ المسافة من طلخا إلى جديلة ماشيا على قدميه لأن المرور منع الميكروباصات الداخلية من الحركة داخل المنصورة في هذا اليوم .... وكان يتمتم طول الطريق وهو غارق في عرقه وهمومه قائلا : حسبي الله ونعم الوكيل .
وانتهت الزيارة "الرسمية جدا" , ولم يسمح للناس الحقيقيين ليخرجوا ويصطفوا على جانبي الشوارع يهتفون بحياة السيدة الأولى , واختفى رجال المرور من أغلب الشوارع والميادين ربما كرد فعل لإرهاقهم الشديد طوال الأيام السابقة للزيارة , وخرج الناس "الحقيقيون" من مخابئهم الجبرية بعد زوال الإجراءات الأمنية المفرطة , واختفى الناس الرمزيين والإعتباريين والحزبيين من الشوارع بعد أن أدوا أدوارهم , وحدثت اختناقات مرورية هائلة بسبب اندفاع السيارات المحتجزة في الشوارع الجانبية وعلى حدود المنصورة منذ الصباح الباكر وهي محملة ببضائع توصلها إلى المحلات التجارية بمناسبة قرب حلول شهر رمضان المعظم أعاده الله عليكم وعلينا بالخير والبركات , والجميع يتقدمون بالشكر للسيدة الأولى على زيارتها , ويعتذرون عن أي أخطاء غير مقصودة تكون قد حدثت أثناء الزيارة .

دكتور/ محمد المهدى

http://mahdyzone.jeeran.com/archive/2008/8/654041.html